Früecher
Es isch wie ä Kreis wo sich schliesst – i bi z Mühlethurne ufgwachse und itze zrugg i «mim» Dorf mit em anniS, u das ersch no im Bahnhof.
Scho aus chline Chnopf hani gärn Süesses u Glace ka, u woni euter bi worde hani au die wunderbare Sache chönne säuber bache und kreiere. Das isch daheime gäbig gange, wiu mi Papa het mir aus glehrte Beck/Konditor geng gueti Tipps chönne gä, we öpe mau öpis droht het id Hose zga. Mis eigentleche Hobby während dr Schuelzyt isch auerdings ds Kunstturne gsi u so bini mehrmaus pro Wuche am Bahnhof ga z Billett löse für mitem Zug iz Training z fahre. U wemer de es ungrads mau usserhaub vom Dorf hei Sache z erledige ka, het mi d Mama mitgno u de simer ufem Heimwäg irgendwo ikehrt – es guets Kafi und öpis Chlises derzue, das hets gliebt. U das si äuä mitunter aues Erläbnis gsi wo scho früeh hei derzue gfüehrt, dass i dä Troum vomene eigete chline Kafi ha afa tröime….
Früecher
Es isch wie ä Kreis wo sich schliesst – i bi z Mühlethurne ufgwachse und itze zrugg i «mim» Dorf mit em anniS, u das ersch no im Bahnhof.
Scho aus chline Chnopf hani gärn Süesses u Glace ka, u woni euter bi worde hani au die wunderbare Sache chönne säuber bache und kreiere. Das isch daheime gäbig gange, wiu mi Papa het mir aus glehrte Beck/Konditor geng gueti Tipps chönne gä, we öpe mau öpis droht het id Hose zga. Mis eigentleche Hobby während dr Schuelzyt isch auerdings ds Kunstturne gsi u so bini mehrmaus pro Wuche am Bahnhof ga z Billett löse für mitem Zug iz Training z fahre. U wemer de es ungrads mau usserhaub vom Dorf hei Sache z erledige ka, het mi d Mama mitgno u de simer ufem Heimwäg irgendwo ikehrt – es guets Kafi und öpis Chlises derzue, das hets gliebt. U das si äuä mitunter aues Erläbnis gsi wo scho früeh hei derzue gfüehrt, dass i dä Troum vomene eigete chline Kafi ha afa tröime….
Bis itze
Ig säuber bi inzwüsche Ü-50 u ha geng no so gärn Süesses u Glace. Nach dr Lehr zur Ougeoptikere hani chli speter no diversi koufmänneschi Us- u Witerbildige gmacht u ha bishär im Bereich Human Resources i leitende Funktione gschaffet. Das isch zwifulos spannend, interessant u abwächsligsrich gsi – aber äbe, dä Troum…… de hani eifach emau d Wirteprüefig gmacht, im Fall der Fälle, me weiss ja nie.
U när – us heiterem Himmu – passiere Sache u es füege sich ganz plötzlech es paar Teili eifach eso zäme und dä Troum wird wahr. A dere Steu es grosses Merci a mini Fründe, Kollege, Bekannte, Arbeitskollege, Verwandte u Gschäftspartner wo mit Ideene, guete Tate u Zyt hei mitgholfe, dass dr Troum het chönne realisiert wärde u ig i das Abetüür ha chönne starte.
anniS
U so darfi iz nid nume im private Umfäud miner Gescht mit auerlei Säubergmachtem verwöhne, sondern ou di. I fröie mi druf, we du mi i mim zwöite Daheime chunsch cho bsueche. Z Motto lutet bi mir «lokal u säuber gmacht» - das heisst, i berücksichtige lokali Produzänte u Lieferante u bache u kreiere praktisch aues säuber. Das isch no so herusfordernd und chli ä Balanceakt zwüscheme grosse Agebot und Foodwaste – i ha mi darum für «klein und fein» entschiede, es het so viel und und so lang, wie’s het.
Ah ja, wägem Name «anniS Kaffee» - i heisse übrigens nid Anni, sondern Susanne oder eifach Sue. Z Anni isch äbe mini Mama gsi, sie hätti ganz sicher Fröid am anniS u würd gärn cho ichehre….